● जुनी सांगवीतील निर्माण आंगण, उषा:काल सोसायटी

 ● बांधकाम व्यावसायिकावर गुन्हा दाखल होऊन आठ महिन्यानंतरही चार्जशीट दाखलच नाही.

● सांगवी पोलिसांनी चालढकलपणा केल्याचा सदनिका धारकांनी केला आरोप. 

● सदर गैरप्रकारात पोलिस आयुक्तांनी लक्ष देवून न्याय देण्याची मागणी, अन्यथा आयुक्तालयासमोर आंदोलन करण्याची भूमिका. 

पिंपरी,दि. २९( punetoday9news):-  इमारतीचे बांधकाम पाच वर्षांपासून आजही अपूर्णच आहे आणि प्रत्यक्ष ताबा मिळण्याचा कालावधी संपून ३ ते ४ वर्ष उलटून गेली असून  बांधकाम व्यावसायिकाने अद्याप फ्लॅटचा ताबा न दिल्याने फ्लॅटधारकांनी महाराष्ट्र नवनिर्माण सेनेचे  राजू सावळे (शहर उपाध्यक्ष) यांच्या मदतीने पोलिसांत धाव घेतली. 

त्यानंतर वारंवार पाठपुरावा करून संबंधित बांधकाम व्यावसायिकावर मोफा अंतर्गत गुन्ह्याची नोंद झाली. पण गुन्हा दाखल होऊन आठ महिने झाले. तरीही संबंधित बांधकाम व्यावसायिकावर पोलिस कारवाईस टाळाटाळ करीत आहेत, असा आरोप महाराष्ट्र नवनिर्माण सेनेचे उपाध्यक्ष राजू सावळे यांनी पत्रकार परिषदेत केला.

पत्रकार परिषदेला महाराष्ट्र नवनिर्माण सेनेचे पिंपरी-चिंचवड शहराध्यक्ष सचिन चिखले, सचिव रुपेश पटेकर यांच्यासह अन्यायग्रस्त फ्लॅटधारक उपस्थित होते.
जुनी सांगवीतील निर्माण आंगण, उषा:काल सोसायटीतील सर्वच फ्लॅटधारकांची बांधकाम व्यावसायिक रवींद्र सुधाकर चव्हाण आणि कमलेश चासकर यांनी फसवणूक केली असल्याचा आरोप करण्यात आला आहे . गेली दोन वर्षे अनेक पत्रव्यवहार करूनही फ्लॅटचा ताबा दिला जात नाही. सर्व सभासदांची नोंदणी 2016-17 मध्येच झाली आहे. नोंदणीनुसार प्रत्यक्ष ताबा मिळण्याच्या तारखेपासून आजपर्यंत ३ ते ४ वर्षाचा कालावधी उलटून गेला आहे.

27 मे 2021 रोजी सदर बांधकाम व्यावसायिकाविरोधात सांगवी पोलिस ठाण्यात गुन्हा दाखल करण्यात आला. 27 मे 2021 रोजी संबंधित बांधकाम व्यावसायिक रवींद्र चव्हाण यांच्या विरोधात गुन्हा दाखल होऊनही सांगवी पोलिसांनी बांधकाम व्यावसायिकाला पाठीशी घालत अद्याप चार्जशीटच दाखल केले नाही असे सदनिका धारकांचे म्हणणे आहे . पोलिसांनी वेळीच न्यायालयात चार्जशीट दाखल केले असते, तर सदर बांधकाम व्यावसायिकाने फ्लॅटधारकांना न्याय मिळून फ्लॅटचा ताबा मिळण्यास मदत झाली असती. पण पोलिसांच्या वेळकाढूपणाचा फटका सर्वसामान्य फ्लॅटधारकांना सहन करावा लागत आहे असा आरोपही करण्यात आला आहे . फ्लॅटधारक शशीकला माने, संदीप जगताप, सुनील भोजने यांनी सांगितले, की सदर इमारतीमध्ये दोन फ्लॅट हे महिलांच्या नावावर आहेत. त्यांच्याशीही सदर बांधकाम व्यावसायिक कोणत्याही प्रकारचे तारतम्य न बाळगता बोलतात. तसेच आम्ही सर्वजण सध्या भाडेतत्वावर राहत असून, सध्याच्या कोरोना महामारीमध्ये घराचे भाडे व फ्लॅटचे बँकेचे हप्ते थकले आहेत. रवींद्र चव्हाण यांच्या सततच्या दमदाटीमुळे आम्हा सर्वांची मानसिक स्थिती बिघडली आहे. त्यामुळे सदर बांधकाम व्यावसायिकावर तात्काळ कारवाई होऊन आम्हाला आमचे फ्लॅट ताब्यात मिळावेत, अशी आमची मागणी आहे.