कंगनाचा बंगला निवासी असल्याने त्यात कार्यालय सुरू करण्यासाठी रीतसर परवानगी घेणे गरजेचे होते. पालिका अधिनियम ३५४ (अ) अंतर्गत कोणत्याही निवासी जागेचा व्यावसायिक वापर करता येत नाही. बंगल्यामध्ये चटईक्षेत्र नियमांचे उल्लंघन करण्यात आल्याचे प्रथमदर्शनी दिसत असून एकूण १४ ठिकाणी नियमबाह्य बांधकाम करण्यात आल्याचे निदर्शनास आले आहे. याशिवाय काही अंतर्गत बदलही करण्यात आले आहेत. यात शौचालय तोडून त्या जागी कार्यालय बांधण्यात आले आहे. त्यासाठी परवनागीही घेण्यात आलेली नाही, असे नोटिशीत म्हटले आले. याबाबत उत्तर देण्यास कंगनाला २४ तासांची नोटिस देण्यात आली होती. कंगनाच्या वतीने कारवाई पुढे ढकलण्याची विनंती महापालिकेला करण्यात आली होती. मात्र, महापालिकेने त्यास नकार दिला. त्यानंतर आज कारवाई करण्यात आली.