सद्यस्थितीत गेली तीन महिने कोरोनाच्या वाढत्या प्रादुर्भावाने संपूर्ण देश व नागरिकांचे जीवनमान अस्ताव्यस्त झाले आहे. या काळात काही ठिकाणी खूप छान रीतीने मदतकार्य समाजसेवी संस्था,  राजकीय संघटना व दानशूर व्यक्तींनी केले. अगदी मदत केल्याची माहिती उजव्या हाताची डाव्या हातालाही कळू नये एवढ्या मोठ्या मनानेही मदत झाली मात्र यातही चमकोगिरी करणे काही ढोंगी व्यक्तींनी सोडले नाही. त्यांच्याकडून  “चार आण्याच्या कोंबडीला बारा आण्याचा

प्रसिद्धीचा मसाला” लावण्याचा प्रकार करण्यात येत आहे  . त्यावरचा कळस म्हणजे स्वतः स्वतःला कोरोना योद्धा पुरस्कार देवून टाकण्यासाठी काही हजारो रूपयांत पुरस्कार वाटणाऱ्या संस्थांकडून पुरस्कार विकत घ्यायला सुरुवात झाली.

या पुरस्कार फॅक्टरी चालवणाऱ्यांची मोठी साखळी शहरात कार्यरत आहे. विशेष म्हणजे या पुरस्काराच्या मानचिन्ह व प्रमाणपत्रावर कोणत्याही अधिकृत व्यक्तीची सही नसते. ना अधिकृत संस्थेचा रजिस्टर क्रमांक. ज्या संस्थेच्या नावाने हे पुरस्कार वाटले जातात त्या संस्थेचे कोणतेही ऑडीट धर्मादाय संस्थेकडे सादर करण्यात आलेले नसते. कारण संस्थाच बोगस असते.  मात्र यात अन्याय होत आहे तो खऱ्या कोरोना योद्ध्यांवर कारण चमकोगिरी करणारे असे पुरस्कार वाटताना आपला फायदा पाहत आपले व्यावसायिक हितचिंतक, नातेवाईक, मित्रमंडळी व भविष्यातील फायदा लक्षात घेवून अशाच लोकांना पुरस्कार वाटत आहेत. त्यात काही ठिकाणी अपवाद वगळता सर्वत्र अंदाधुंद प्रकार चालू आहे. विशेष बाब म्हणजे अशा अनधिकृत संस्थेचे पुरस्कार कार्यक्रम हे सरकारी कार्यालयात, पोलिस स्टेशन, हाॅस्पिटल मध्ये होत आहेत व अशा सरकारी ठिकाणी कार्यक्रम होत असताना संस्थेची अधिकृत माहिती तेथील प्रशासकीय अधिकारी न घेता कार्यक्रम घेण्यासाठी परवानगी देतात हे ही आश्चर्य म्हणायला लागेल. शिवाय अशी चमकोगिरी करणाऱ्या दुकानदारांचे फोटो हे सद्यस्थितीतील नियमांचे उल्लंघन करून तोंडाला मास्क, रुमाल न लावता, कसलेही सोशल डिस्टन्सिंगचे पालन न होताना पहावयास मिळतात. हा नक्कीच गंभीर व समाजासाठी विघातक विषय आहे. त्यामुळे किमान सरकारी यंत्रणेत कार्यरत असणाऱ्या कर्मचारी व अधिकारी वर्गाने तरी नियमांचे पालन करत योग्य खबरदारी घ्यायला हवी. अन्यथा एकीकडे कोरोना योद्धा पुरस्कार घ्यायचा आणि दुसरीकडे शासकीय नियमांचे उल्लंघन करायचे हे समाजासाठी घातक ठरेल. त्यामुळे  शासनाने अशा कोरोना योद्धा पुरस्कार वाटणाऱ्या संस्थांसाठी नियमावली घाालून देवून त्यांची सरकारी नियमानुसार नोंद ठेवावी अथवा त्यासाठी तशी व्यवस्था करावी जेणेकरून खऱ्या कोरोना योद्ध्यांचा सन्मान होऊन समाजात योग्य संदेश जाईल व योग्य  कतृत्ववान योद्ध्यांना न्याय मिळेल.